ბარი სამზარეულოში

ბარი, როგორც სამზარეულოს კონსტრუქციის ერთ–ერთი ელემენტი, ბოლო დროს განსაკუთრებული პოპულარობით სარგებლობს. როდესაც საუბარი ეხება არც თუ ისე დიდი სამზარეულოს მოწყობას, შეიძლება ითქვას, რომ ბარის დამონტაჟება აუცილებელიც კი ხდება სივრცის ეკონომიის, პრაქტიკულობისა და მრავალფუნქციურობის გამო. ამასთან, სამზარეულოს ეს ობიექტი თანამედროვე სტილსა და „მოდურ“ ვიზუალსაც მატებს ინტერიერს.

ბარი, როგორც სამზარეულოს ავეჯის შემადგენელი ნაწილი, მაღალი, ძირითადად 115 სმ–ის კონსტრუქციაა, რომელშიც შეგიძლიათ სათავსოებიც ჩაამონტაჟოთ, ინტერიერის დეკორატიულ აქცენტად გამოიყენოთ, ან ოთახების ზონებად გამყოფის ფუნქცია შეუთავსოთ.

დიზაინის თვალსაზრისით, შესაძლებელია გამოვყოთ ბარის შემდეგი ძირითადი სახეობები:

მოდული – ამ სახის ბარი მზადდება სხვადასხვა მასალისგან, იქნება ეს ხე, მდფ, შუშა, მეტალი, აქვს მარტივი ფორმა და მკაცრი ხაზები. რადგან იგი არ არის მიმაგრებული სამზარეულოს ფურნიტურაზე, მისი გადაადგილება ადვილად არის შესაძლებელი და ოთახის ნებისმიერ მონაკვეთში ნებისმიერ დროს შეგიძლიათ გადაანცვლოთ.

ჩაშენებული ბარის მაგიდა – ამ ტიპის ბარი ერთგვარ ტიხრად შეძილიათ გამოიყენოთ, მაგალითად, სამზარეულოსა და მისაღებ ოთახს შორის. შიდა მხარეს შეგიძლიათ კარადები და სათავსოებიც გააკეთოთ. 

ბარი, როგორც სამზარეულოს სამუშაო მაგიდის გაგრძელება – ეს ძალიან მოსახერხებელი ვარინტია განსაკუთრებით პატარა სამზარეულოსთვის. 

მარტივი კონსტრუქციის ბარი საყრდენებზე – ეს ვარიანტი შეიძლება იყოს ღია ტიპის, სათავსოების გარეშე, რომელიც სივრცეს ეფექტურად ზოგავს და საჭიროების შემთხვევაში, სამზარეულოს სამუშაო მაგიდად შეიძლება გამოყენება.

ორ დონიანი ბარი – ამ ტიპის ბარის პირველი დონე სამუშაო მაგიდად გამოიყენება, მეორე კი სერვისისთვისაა განკუთვნილი. ორივე დონე შესაძლებელია სხვადასხვა მასალისგან იყოს დამზადებული, მეორე დონეს უმეტესად მინისგან ამზადებენ. ბარის ამ სახეობას შესაძლოა სამზარეულოს ე.წ. კუნძულის ფორმა და ფუნქციაც ჰქონდეს. 

შეგიძლიათ ბარი გააფორმოთ აქსესუარებით: გამოიყენეთ მეტალის სპეციალური ღერძი, რომელზეც მაგრდება ჭიქების, ბოთლებისა და ხილის საკიდები, აუცილებლად დაკიდეთ ბარის თავზე გრძელი სანათები და რა თქმა უნდა,  შეიძინეთ მაღალი სკამები.

მასალის გამოყენების პირობები: გთხოვთ მიუთითეთ წყარო: luxhome.ge